Iste chueves, 2 de mayo, a las 20:00 horas en o "CSL La Pantera Rossa" presentación d'o comic en aragonés "Harry  Clever, o detective más peligarcero d'a ciudat" por o periodista Óscar  Senar y os autors. A las 21:00 horas brenda dimpués d'a presentación en  "A Flama" (Carrera Mayor, 53). Harry Clever ye o detective más peligarcero d'a ciudat. Creyau fa más de 15 anyadas por o dibuixant Chema Cebolla ta la revista  451º, iste anti-heroe ye una sarcastica mofla d'aquells detectives  privaus, balloqueros, traicioners y mullerers que fan parte d'o chenero d'o cine negro d'o Hollywood d'os anyos 40 y 50 d'o sieglo pasau. Collas de gangsters, presecucions d'autos, carrerons foscos, zarracuchos  afogaus en o fumo de tabaco, polidas mullers que nomás se veyen como  obchetos, combates de boxeo achustaus...Totz istos ingredients, de mal estomacar, fan parte d'a vida cutiana de Harry Clever. Con os suyos muitos defectos y pocas virtutz Harry Clever esboldrega a l'arreu totz os mitos d'a novela policiaca. S'ha dito que Harry Clever ye un personache "noir", tamién que Harry Clever ye un tebeo muito "pulp", pero de lo que no bi ha garra dubda ye de que Harry Clever ye o detective más peligarcero d'a ciudat.